«Сәукелелі ару – 2023»

Қазан айының ортасында Ақтөбе қаласының әкімдігінің қолдауымен «Қазақстанның саңыраулар қоғамы» ҚБ Ақтөбе облыстық филиалына қарасты  Мәдениет үйінің ұйымдастыруымен  «Сәукелелі ару-2023» есту мүмкіндігі шектеулі арулар арасында Халықаралық І байқауы болып өтті.

Әр тараптан келген сұлу қыздар 4 кезең бойынша сайысты.

«Сөз анасы – сәлем» демекші, иба мен көргенділікті, үлкенді сыйлау, кішіге ізет көрсетуді ұлық тұтқан аналарымыздың жолымен «Қыздар сұлу көрінер сәлемімен» кезеңінде қатысушылар сахнаға  ұлттық киіммен шығып,  өзін, туып-өскен елін таныстырды.

«Өнерлі өрге жүзер» кезеңінде арулар өз өнерлерін паш етсе, «Салтын сыйлаған ел озар» кезеңінде қазақтың салт-дәстүрі мен әдеп-ғұрпынан көрініс сыйлады. Ал «Сәукеле салтанатында» этно және заманауи қазақтың ұлттық киімі мен бас киімі үлгілерінен дефиле көрсетті.

Қатысушылардың сахналық мәдениеті мен киім үлгісін, бойындағы таланты мен жан-жақтылығын, әртістік шеберлігін сарапқа салған қазылар алқасы жүлдегерлер есімін атады.

Сұлулық пен нәзіктікті, сыр мен сымбатты бойына сіңірген есту мүмкіндігі шектеулі арулар арасындағы «Сәукелелі ару -2023» І халықаралық байқауының «Сымбатты ару» номинациясын  Алматы қалалық Саңыраулар  мәдениет үйінің қызметкері Анастасия Самойлова жеңіп алды.

Жарайсың, Настя!